Gabon-gaba

Martin Ugarte

                 Ator bai ator, Gabon-gaba,

                 Elur-loretan mara mara...

 Seaska zarra kulunkaz darrai,

 alaz aurtxoak begiak ernai...

 Nork ito dio lo-miña berai?

 Aiton-amonak orra billobai:

 Dantza mutillak! Dantza neskato!...

 lurrak bere dik bein-betirako

 egizko bide bakarra!

 ...Ontziok bete, barrunpe-aztal,

 intxaur zukulu, bakallo-ezpal...

 Gaztain errean zirrara...

 Gure baserri sukaldeetan,

 apal-orduko irri-karkara,

 pozaren-pozak sendi bilduan,

 beteaz sabel-ijara...

                 * * *

 Ta ordu berez Belen urixkan,

 Jose ta Mari otz-otzik,

 jaio bide dan aurtxoa amets,

 legorpe txatxar-bat ezik.

 Eta antzera ainbat senditan,

 erruki bear luzaroz...

 Giza-arteak jaurti ta ospel...

 Aurtxo beraren itxaroz!

 Orra Zeruak len-agindurik argi dizdira,

 bein-betirako giz-aro denen bigungarri.

 Dena lezaken Jaunan almenak utsa bailira,

 aur txatxar dela ezerezaren ezaugarri...

 Gau-otz luzean, eta billotsik lasto gañean,

 seaska orde ganbela baten otzak dar-dar.

 Jainkoa bera gure errukiz giza soñean,

 abere biren arnasa dula epel bakar!...