Ipar eta hego

Jean Louis Davant

 Iparra

 lur galdua

 gau eta lano

 lokatzen eremu

 gezurren erresuman

 urruti hotzetik

 izar baten pizle.

 Iparra

 ene lurra

 ene bizia

 ezin dizut erran

 "aberria zu zaitut"

 hegotik baitut ekia

 biziaren pizle.

 Iparra

 zu zaitut ama

 aita dut hegoa

 urradurarik ez!

 Eguna eta gaua

 beude josirik

 denbora batuan.

 Aita zergatik

 ahantzi gaituzu?

 Ez gara bastartak

 iparreko haurrak

 ongi edo gaizki

 ohorea zaindu

 nahi badugu.

 Aitaren etxea

 zaude bada zutik

 iparreko haurrek

 zu baitan dugu aurki

 askatasun bidean

 noizbait behar dukegun

 aterbe saindua.

 Aitaren etxea

 dugun atxik egun

 amaren atalai

 denen gotorleku

 mendi tontorrean

 lanoen gainetik

 zelaien zaindari.