Ortzi'ren ttunttuna

 {TITULUA}

Mirande'tar Jon'ek

 Ortzi'ren ttunttuna dabil soinutan,

 Ezereza gainti rhythmua heda.

 Huna ¡ttunttunaren dantza-hotsetan

 Ezereza uhin bilhakatu da.

 Soinu-uhinetan agertu-eta

 Biraldatuz doa izaiki oro

 Ttunttunak jo arte dantzaren beta:

 Jaio'ta hor-izan eta igaro.

 Hotsaren uhinak darabiltzate

 Izaiki guztiak goiti behera

 Lehen goizetik gaua hel arte

 Bethi berdin dira, nehoiz ez dira.

 Ortzi dantzariak ttunttun-hotsetik

 Ixuri daroaz suzko uhinak;

 Izaiki bakhoitza iragaitetik

 Ikhuz bitza suon bere orbanak.

 Jainkoaren esku ezkerretikan

 Sua itzali da eskumaldera,

 Izaikiak oro suzko errekan

 Iragaiten dira, beheiti gora.

 Bethikotz sortzen du ttunttunak uhin,

 Iragaitza hunek bethikotz dirau;

 Halatan hor-izan den oro, behin

 Hor-date berriro, lehen zen arau.

 Bainan ttunttunhotsak urrhena duke

 Gaua horra dathor, sua erhanda.

 Izanen da berriz bethiko bakhe,

 Uhinen lilura hamaituren da.

                                                                       24-X-52.