Breizh hondamen
Angela Duval
- Bertsoak? - bai, idazten ditut!
Baina ez zait gustatzen bardo deitua izatea!
Zizare-pikatzale baita betidaniko nere ofizioa.
Jender bezala mintzo naiz ene kabaler...
Ura arrainari laket zaion eran
nere lana asko maite dut.
Ordea gustatzen ez zaizkidanen
salatzea komeni zait:
ez zait gustatzen herriko bazterrak
abere basen gerizatzeko lurruts
bilakatzen ikustea,
ez zait gustatzen herriko etxaldeak
arrotzen eskura paper-truk
iragaiten ikustea.
Ezin dut jasan, neholaz ere
funtsik eta urrikirik gabe
herriko besuņak -zeltiar lurren neurri
eta ingurumen- xeheka ditzazten
eta saldua izan dadin
zapaltzale burlakoiari
hirietara lasterka doan gazteriaren
indar eta bizinahi librea.
Ez zait gustatzen herriko zaharrak
hirietako hiltegi antzuetan beren neke galduaz
damutzen ikustea
ez eta herriko ama gazteak beren haurrer
zapaltzalearen hizkuntzan
mintzatzen entzutea.
Katearen haustea krima bat da;
herriaren pozoindatzea krima bat da.
Nehork ez du protestatzen,
Nehork! Edo... kasik nehork
Horregatik bertsoak idazten ditut nere ofizioa ez bada ere,
nere tristuraren gordetzeko,
nere malkoen perla altxor moldean zaintzeko... Alabaina
non atxik azken haziak,
poeten baratzetan ez bada?
