Lo gabean oraindik
Itxaro Borda
lo gabean nagon oraindik, eguna gris altxatzen
den goiz huts honetan,
txori ausartak hegaldaka xotilaz
hegatz hegia laztandu din,
hire ezpainek nere sorbalda bezala, eztiro.
aditzak, asteburuak bezain trinko dabiltzalarik,
- badea denborarik guretako? -
hitzak, paperean nagi, lerratzen zaizkidan
gau-mineko xenderetan iheslari,
hire ezpainak nere sorbaldan bezala, eztiro...
lo gabean nagon oraindik, eta goiz gris honetan,
euria egin dezakeelarik,
uhar desiratuek, arto elge idorrak bustitzen
dituztela itxuratzen dinat,
hire ezpainek nere sorbalda bezala, eztiro...