Txillardegirekin kafea hartzen Parisen
Itxaro Borda
I.
txoriek amodio sasoinean zeruaren
urdina labantzen dutenean
bakearen harrobietan
beleak borrokan.
desastre arrunten globoak suntsiturik
hilotz etzan
bakardadea zer den ez dakiten
jenden artean negarrez
garagardoak ezin edanez.
II.
munduko madarikatuen
zerrenda koloretsuetan
sartzen gintuzten
hizkuntza beltzegia
genuelakoan.
presoak
isolamendu zeldetan
presoak.
izarren ihesaldietan
gosea hedatuaz lurra
lapurtzen ziguten
auhena samurregia
genuelakoan.
presoak
isolamendu zeldetan
amnistiarik ez
guretako
reggae.
III.
aizu
Jose Luis
zer edango duzu?
- bierra bat...
- kafea eskaintzen dizut
diruz labur nagoelako.
aizu
jose luis
zer idazten duzu?
- lumpenliteratura...
- nik ere aspaldi honetan
ez dut besterik egiten.
aizu
jose luis
sartre aurkitu ahal dozu
mutualitateko geletan?
- oraindik...
- hemen omen dabila bazter
aberatsak ere nahian.
aizu
jose luis
zer gordetzen da haizeaz
bestaldetikan?
- mendeko barbaria...
- kartzela emparantzako
bantustan berrietako harrietan.
aizu
jose luis
ba ote da treinik etxera
eramango gaituenik?
- bai...
- beste kafe bat
jose luis
aizu.
IV.
zuek
hegoaldeko aberkideak
ez ezazuela iparraldea
ahantz
bi estado zentralistekin
zinez
negoziatzen hasiko
zaretenean.
ordua etorriko denean
gogoan har ezazue
ez garela bakarrik
babesleku
paseia leku
uda leku
ez egin
irlandesek ulster ingelesen
meneko utzi zutenean bezala
beren independentziaren
truke.
orain
diogu
euskadiizenik mereziko duen
herririk ez dela izango
nafartarrik
lapurtarrik
zuberotarrik
gabe.
edo betiko
gabe geldituko gara.
V.
bururaino joan beharraren premia
ezezta dezagun
bide eskasetan galduko gaituzte.
oloaren gustu kiretsean ihaurika
hil gaitezen hil
jatera emango digute ase artean.
VI.
sartaldetik datozen hedoien artetik
ainaren hegaldi arinak dakuskit
arats apal lasaietan.
oihuka has nitake baina ondikozko
hasperen gordeak oro higatzen
zaizkit gauaren mortuan.
esperatzerik badea ?
laparreko elorria eskutan dut hartzen
geroaren mikatz dardaratiaz
herabeki betetzeko.
ainaren hegaldi arinak dakuskit.
negar gogoarekin irri gogoz nago
ortzeak hondorik ez duelako.
esperatzerik badea?
ipular dudakorretan denbora pasatzeko
haragi puskak bortizki plegatuz
atzoko arpegi hotzak
astiro arrakonposatzen ditut
ordea satorren egunerokotasunean
nehor ez duket ezagutzen.
esperatzerik badea?
haize hormatuak ur gosez dauden artadi
zabalak aspertzen laztantzen ditu
bihiak irinaz hustuz betiko.
lurrean etzanik arresten dut behineko
amodioaz sangreatzen nautela
eta hire gorputzaz asekaitz ibiltzen naun.
esperatzerik badea?
esperatzerik badea?