Thanatos irratia F.M.
Itxaro Borda
menderen mendetan metatu minen
oihartzunak
dakarzki thanatos irratiak
nortasun ukatuen ahalge gorria
aditz mutilatuen orro metalikoa
heriotz hurbilaren beldur beltza
dolu orokorrak iluntzen ditu
mendi eta aran orlegien hedadurak.
thanatos irratia, euskaraz!
lehengo garai idealizatuen zerrenda
bakartasun berriaren ustel usaina
desagertu den larderiaren nostalgia.
menderen mendetan jasan indarraren
mendeku garrasiak
dakarzki thanatos irratiak
nekezal gizartearen oihal urratua
lobelarrez setiatu etxe hustua
hilherri herabe eta abandonatua
tristezi iraunkorrak hezten ditu
trikitixen akordeoi alaien soinu biziak.
thanatos irratia, euskaraz!
sortzetik hiltzerainoko agonia luzea
gaurkotasunaren ihesketa desesperatua
zaharrei zor diegun errespetu larria.
menderen mendetan irri nahi debekatuen
mehatxuzko karkarak
dakarzki thanatos irratiak
gauzatzen diren tradizioen aipamen lasaiak
folkloreak bizihaztu loreen kolore hitsak
iraganean oinarritu gero hormatuen menturak
te deum erraldoiak kulunkatzen ditu
euriaren hildoa ekar lezaketen laino grisak.
dies irae, dies illa...
gerletan zenduen hezurren auhen kantak
herritik urrunduen malko faltsuen eresiak
hondatzen doan untziaren kapitain ausarta
thanatos irratia, euskaraz...