Bizitza emanen dionean
Iņaki Azurmendi
(Zintzhilik Literatur Lehiaketako 1. saria poesian)
Poesia
beldurraren teilatuetan
hagitz leihatila aldatsa
farola hitsak adatsa loturik
luketen elizetan xumeak xurail
adimenak hormetan sartzen
tabakoetan erantziak
mototsak
poesiaz pasiatzen
zakurrak beren jabeekin
teilatuetarik
loteria saltzaileek
azken hamabiak lituzkete
oihukaturen
atalaia urrinen oroitzapenen ertzean
baileude, ittorik
galeria komertzialen gibelean
Eldarnioaren opera
hitzetan konposatua
harmonian
poesiaren joan-etorriaren gainetan
urteen adoleszentzian, heldu
ezinezko eta hilezkor
zazpi egunen buruan
ortzearen orrialde zenbakituak
baina poesia
mariken mintzoa
ihintzaren esnatze galduetako
orenetan
hipokritek axaletan
mamitzen
beren helburuen zakila,
zakiletan ediren
erditzearen biluziak,
beltz,
doratu
karminezko koldarrak gu,
aiurri iruntzien
kafesneetan ittoren gareneko
malkoak,
haragi malutak
hezurretan eta xirula eztiak
lilietan.
Askatasuna egarriz
orrialdeen bularrak amatiar,
askatasuna egarriz
askatasuna
lohien puztua
hidoiean mutua
ezein itsasoaren dantzak
urratsetan printzak atxilotzen
gauaren alaranjatuaz, urdin
lohiaren zapuzteaz, urdin
eta ene egarriaren askatasuna
hilotz
behiala kantatu zuen hizkiaren
itzalari bizkar
betzuloak
begiak hotz
eta bihotza bikoitz;
ene arnasaren bitsak, intziri
aske nahi du izan
luma beltzak ez bezala oren batak kanpaiak xahutu
ditueneko ilunean, akituak
aske nahi du izan
zikoin moreen zilindradak
iguzkiari bizarra inoiz baino
urdinago
moztuko dionean
libertatea,
belaze azulen azalera
brontzeatzailerik ezean
libro
nahi dut izan, libro
arma ipurdien tintaz
odolustua
praka beltzen inkontzientzian
hats deitoratua sabelean
urmahel herrenen
askatasuna libro
ziega iltzatuen altzoan
libro nahi dut
ukan ere mintzoa.
