M. Taberna "Kapi"

 gaua luzatzen dugu

 urrezko flekilloak bilaka

 farolen adarretan barrena

 eta katu begiraden azpian

 amildu nahirik

 gaua luzatzen dugu

 beirazko ontziei keinuka

 ostatu ilunduetako hodeietan

 eta irri eutsietako ezpainei

 begira

 gaua luzatzen dugu

 ilargi itsugarriak behartuta

 hiriaren espazio itoan

 eta tristura konprenigaitzaren

 zama adiskidearekin

 gaua luzatzen dugu

 zuku beltzaren azken tanta xurrupatuz

 asesinatu nahi ditugun erlojuen atzetik

 eta komunikazio ezintasunaren hatzaparretan

 preso

 gaua luzatzen dugu

 hauts bihurtuko diren ametsak fabrikatuz

 ustezko zorionaren itsasoko txalanta morean

 eta mugierazten gaituzten hari beretatik

 zintzilik

 gaua luzatzen dugu

 haragizko ezpatak zauriturik

 torturagelako oihan laberintikoetan

 eta egun berriaren errainu pozointsuen

 beldurrez