Lehertzeko garaia

Linton Kwesi Johnson

euskaratzailea: Xabier Montoia

 malko garratzen urte latzak

 iluntasuna ezaguna oinazez neurtua

 etsipen beltzak odola borborka irakin artean

 eta begiak ia errautsa irudi anbarrei

 azkar atxikitzen zaizkie:

 suzko atzamarrak bezala jendearen pakean

 harriak bezala ume beltz baten haziketaren gainean

 labainak bezala nire herriaren itxaropenean

 heriotza bezala nire bizitzeko eskubidearen gainean

 eta horrela odolaren zina egiten da;

 eta horrela neuk nozitu, jaiki eta oihu egiten dut:

 nere herria! lehertzeko garaia da;

 bota zure zama, zure haragi ustela,

 zure irrifar okertua, zure suzko begirada,

 zure malko garratzak, zure landatze morroiaren urteak,

 harri koxkor eta lehorte eta zimiko eta ekaitzarik

 igitaitu egiten dituzun artean.

 lehertzeko sasoia, nere herria! zure etsaiaz libratu!