Senpereko partidaz
Zubiria, Jean Pierre (Panpilli)
1
Jondoni Petriz dire Senpereko bestak,
Horrek alegeratzen baitauzku bihotzak:
Libertitzeko dira musika ta dantzak,
Bai eta plaza hortan partida xarmantak.
2
Pilota paroda bat Senpere herrian,
Lehengo lau plekari zaharren artian:
Fama hedatua zen jada aspaldian,
Elgarrentza zirela hoiek fantesian!
3
Besta astelehena zuten hautatua,
Elgarrekin iteko delako gudua:
Bakan gertatzen baita holako kasua,
Ikustera bildu da gaitzeko mundua.
4
Lauetan zaharren aita Iratzoqui:
Oinon pilota dailka jaun horrek airoski!
Nahiz Notarik duen lagundu ederki
Amor in dute, bainan ez hale errexki!
5
Kontrariuak ziren Barnetche eta Daguer,
Plaza gizon xarmantak haundi eta eder:
Ederki plantatuak eskuin eta ezker,
Behar orduan dute oinon iten laster..
6
Batzuek saka eta bertzek errefera,
Ezin obeki lauak horxet aizan dira:
Trebeslariek zuten gaitzeko afera,
Zerbeit irabazteko hor baitzen manera!
7
Atorra xuri eta berdin xuri galtza,
Ainitz ederra baitzen lau hoiekin plaza:
Errex da pentsatzia zertan zuten hutsa,
Gibel aldetik ez da artzen ahal hatsa!
8
Harren ondotik dute ederki bazkaldu,
Apetitua hola aise baita eldu:
Hoi ere ohorezki dute bururatu;
Jan eta edatia ez dute debeku.
9
Plekariak Senperen bethi izan dire,
Oinon badira eta izanen gerore:
Lau zahar hoikieri bihotzez ohore.
Biba zahar gaztiak bai eta Senpere!