Senpereko herria

Zubiria, Jean Pierre (Panpilli)

 1

 Senpereko herria ene sor lekua

 Tiki-danik bihotzez ainitz maitatua

 Berritan hor izanik nago xoratua

 Lehen-danik zonbat den hoi kanbiatua.

 2

 Etxe berriak dira bazter guzietan

 Airoski muntatuak oraiko moldetan

 Famila berri ainitz segura hoietan

 Senperen jendea da doblatu nunbeitan.

 3

 Landa hoietan hola eginik etxeak

 Ordainak behar ditu in laborariak

 Ateratu dituzte eremu haundiak

 Larre larrekietan inik lur berriak.

 4

 Ainitz edertua da lehendik Senpere

 Etxe zahar gehienak berrituak dire

 Alderdi orotara bada errebide

 Etxe guti Senperen otorikan gabe.

 5

 Lan mota guzietan dira tresnaz ari

 Lanak laster iteko balios da hori

 Lehengo moda ere eder zautan neri

 Hamar bat gizon landan lerroan segari.

 6

 Senpereko herria haundi ta zabala

 Jada aspaldi badu hor sortu nintzela

 Eta orai zahartu zuzen den bezala

 Pasatzen den denbora ezin da gibela.

 7

 Sortuz geroz emeki denbora pasatu

 Lehen zahar zirenak mundutik partitu

 Orduko gazteria orai da zahartu

 Moda hori hor ere ez da kanbiatu.

 8

 Lehenago lan ainitz iten zen bizkarka

 Orai aldiz denetan dena mekanika

 Bizi dena zahartzen ezin da espaka

 Guri orai denbora pasatzen lasterka.

 9

 Ofizio bortitza bainan baliosa

 Ederragorik ez da nola laborantza

 Izana-gatik pobre ala aberatsa

 Hortik atera behar jatera denentza.

 Kantari bezen kartsu hor da jaun ertora

 Taila ederrekua herriko jaun mera

 Jainkaak igorriak denen gidatzera

 Hil ondoan heltzeko guziak zerura.