Senpere-ko bertze seme bati

Zubiria, Jean Pierre (Panpilli)

 1

 Sujeta bera bainan airea chaindatuz,

 Berritz ere nahi nuke hemen asi kantuz;

 Senpereko berriak horrela adituz

 Plazerretan jarri naiz, bihotza gaindituz.

 2

 Bigarren herritarra dugu ohoretan;

 Bertzerik izan daite bertze egunetan;

 Kaskoineri entzuna hau dut nik frangotan:

 Hiru gabe ez dela izaiten bietan.

 3

 Batto Larregi eta bertzea Gachinto,

 Etcheko seme onak hoik biak askitto:

 Frogak eman dituzte ez direla tonto,

 Beren ganat bildurik hoik bedera tanto!

 4

 Gizon gaitzak zirela diote leheno,

 Hori etzuna dugu denek egundaino...

 Zombeit bakar badire han hemen oraino,

 Gero ere izanen hazi ona deino!

 5

 Gizona gizon dela dudarik ez baitu,

 Lehen ere bardinak direla izatu,

 Guziak bardin chantzak laguntzen ez ditu

 Okasioniaz ere behar baliatu.

 6

 Guzientzat atsegin plazer ta ohore:

 Mundu huntarat jinak holakoak gare.

 Eman zagun aintzina hola gero ere.

 Biba Eskual herria bai eta Senpere.