Sanjamendua
Zubiria, Jean Pierre (Panpilli)
1
Legeak hola manatzen baitu bozetan dugu Frantzia
Zazpi urteintzat hautatu behar Frantziako gidaria
Aspaldi huntan eskuin aldetik ginuen gure nausia
Ezkerreko bat uste gabean da president ezarria.
2
Ezker aldean Mitterrand eta eskuinarentzat zen Giscard
Agintza frango egin daukute bentzutu beharrez elgar
Ezkerrekoa hautatua da zerbait hobe dezan ekar
Ondorioan zer izanen den hori ageriko bihar.
3
Denen onetan gidatu behar bakotxak bere moldean
Bizi moldea hobetua da guziendako Frantzian
Gauza nasaiki denetan eta bizi ga libertatean
Horren eskasa ainitzek dute gure mundu zabalean.
4
Igan denbora ezagutu dut, aspaldi bainaiz sortua
Frogatu gabe ezin konpreni izan den sanjamendua
Guzietarik nasaiki eta sakela bete dirua
Bizitze hunek kontina dezan otoitz dezagun Jainkoa.
5
Ontasunetan beharrezkoak hauk biak ditut kausitzen
Osagarri ta libertatea elgarri ditut juntatzen
Hoikien jabe hemen gareno ez gare hanbat ohartzen
Hoik biak zenbat balios diren, galdu ondoan sentitzen.
6
Batzuek beti eskasa eta bertze batzuek sobera
Ainitz hobeki izana gatik denek zerbait errengura
Gerore hola izanen dela hori da gauza segura
Gure Jainkoak gida gaitzala hale guziak zerura.