San Leon
Zubiria, Jean Pierre (Panpilli)
1
Baionako patroina betiko San Leon
Martir ederragorik ezin daite nihon
Igandean jendea zuri buruz zagon
Zuk hedatu fedea azkar dadin egon.
2
Hemen lehen jendea zelakotz pagano
Jainkoak gidatua zintuen hunaino
Fedea erain duzu zuk hemen leheno
Otoitz zazu Jainkoa azkar dadin oino.
3
Errekolta biltzeko erain behar dela
Mozkin onik etortzen ez baita bertzela
Gizonen salbatzeko Jesusek bezala
Zuk ere hor zinuen ixuri odola.
4
Gure apezpikua Jean Paul eta Vincent
Obra hoi segitzeko kargua du izan
Horrentzat otoitzean denak gare aizan
Gure artean luzaz Jainkoak utz dezan.
5
Apezpiku gaztea Roger Etchegaray
Betiko eskualduna Parisen da orai
Predikua in dauku garbi eta arrai
Horren kontseilueri denak gaiten jerrai.
6
Hiru apezpiku ta hoita zonbait apez
Gaitzeko mundua da ere bildu jendez
Musika, kantu eta bertzeak otoitzez
Denak hor aizan gira saindu horri galdez.
7
Ederki beztitua zuten, gurutzia
Ezpelez eta lorez eginik jauntzia
Eta hunkigarri zen horren biluztia
Plazer du aldaxka bat etxera kartzia.
8
Saindu horren denboraz zonbeit xehetasun
Plazerrekin ditugu predikutik entzun
Orai ere zerutik oi gaitzatzu lagun
Eskualdunak egoiten eskualdun fededun.