Pilotaren on-gaitzak
Zubiria, Jean Pierre (Panpilli)
1
Pilotaren kalteak emanak kantutan
Irakurtu berri tut Herria kazetan
Jende ainitz badela oro bazterretan
Hori dela medio dagonik penetan.
2
Euskal-Herrian eder plaza errebota
Harat hunat airean dabilan pilota
Plekariak xuritan gorri perde zinta
Ikustera biltzen den horko jende keta.
3
Arbasoek utziak ainitz ohidura.
Euskal-Herrian oinon uruski badira
Gure eskuetan da hoikien mentura
Erortzerat uztetik detzagun begira.
4
Denak gare pilotan haurretik aizanak
Ainitz txarren artetik ateratzen onak
Plekari famatuak eta jaunen jaunak
Euskaldunetan dira gutiz gehienak.
5
Begia erne eta zango hankak zalu
Pilotaren ondotik ibili behar du
Aitzin gibel bazterrak ongi behar zaindu
Leku txarretik ere onera bear bildu.
6
Batean eskun eta bertzean ezkerra
Pilotaren ondotik in behar lasterra
Nihaur izana gatik pilotari txarra
Partiden ikusteaz haundi dut plazerra.
7
Batean aitzin eta bertzean gibela
Igortzen den lekuan pilota dabila
Hortan duda gabe da bertzetan bezala
Txarrenak amor aman beharko duela.
8
Batzuek maite eta bertziek hastio
Denen gostua egin nihork ezin dio
Partidetan iten da zernahi pario
Ainitzeri partida gostatzen kario.
9
Pariotan husturik moltsa ta sakela
Bertzalde egin dio kopetan uspela
Horren solas moldea laiteke bertzela
Pilotan trebe balitz pertsutan bezala.
10
Pilotari kausituz horren bertze gaizki
Bertze errenkurarik horrek badu naski
Eskua minberatzen, kasik ezin hunki,
Semea, bera baino hobea izanki.
11
Xatxaria kantari pontuen kondatzen
Azken kintzeak ditu guziak trenkatzen
Parioko dirua ez da arras galtzen
Batek galtzen duena bertzeak du biltzen.
12
Nihork ez du egiten denen atsegina
Batzuentzat kalte da bertzentzat on dena
Nik hau kantaturen dut ahalik gorena
Biba pilota eta biba euskalduna.
13
Lapurdi Xuberoa artean Garazi
Denetan gazteak du aise iten jauzi
Bertze aldi bat artio hor nahi dut utzi
Kantu haukien bidez igorriz goraintzi.
