Panpilliren sort-etxea
Zubiria, Jean Pierre (Panpilli)
1
Landa bixkar batean zer etxe pollita
Ate leihoak gorri xuria pareta
Teilatuan ximini hertxi bat xut-xuta
Leku airosagorik etzitaken hauta (bis).
2
Xarmanteko haizteia etxe gibelian
Xoriak hortik kantuz argia astian
Plazer du egoitia horko itzalian
Iduzkia sobera bortitza denian.
3
Berroz inguratua eder baratzea
Egun guziez hortik betetzen eltzea
Porru, aza, tipula ta pastenarrea
Xarpot eta perrexil, biper, tomatea.
4
Sagar, udare, piko, gerezi, mertxika
Xarmanki landatuak dira han hemenka
Sahetsetik pasatzen iturri erreka
Ur freskoa badoa kantuz itzulika.
5
Gibel-aldean heia kabalez betia
Behi, oilo, lapinak bai eta xerria
Haiztegitik segidan hor du larrekia
Kabalentzat janaikin behar ihaurkia.
6
Etxetik jalitzean hor da laborantza
Bizi moldea hortik heldu da denentza
Ogi, arto, patata, ilar ta mahatsa
Ongi artatu behar biltzekotan gauza.
7
Negua pasatzeko zuhaina behar da
Fresko eta ederrik segidan da landa
Parte bat zelai eta bertzea da malda
Euskal-herrian ainitz lekutan hola da.
8
Oilo salda artetan gustatzen baitzauku
Heia kantoin batean hoientzat da leku
Oilarrak errebeilla goizik joiten dauku
Argia hasi gabe inez kukuruku.
9
Etxearen zaintzeko ernerik xakurra
Beharriak zut eta buztana laburra
Gatuak aldiz beti xekatzen leihorra
Kanpoa bainon hobe zaio supazterra.
10
Etxetik partitzeko jin zen ene aldi
Gazterik Baionarat gan nintzen aspaldi
Hantxet aditu ere eta zonbat aldi
Guzietan badela galtzen bet'ipurdi.
11
Iduzkiari beti segitzen itzala
Jada aspaldi in du hor sortu nintzela
Eta oral zahartu xuxen den bezala
Pasatu den denbora ez heldu gibela.
12
Herriko paperetan hau da irakurtzen:
Hemeretzi ehun ta bian sortu nintzen
Ohartu gabe baita denbora pasatzen
Hiru hogoi-ta hamar urtez aurten naiz jabetzen.