Munduko nere denbora
Zubiria, Jean Pierre (Panpilli)
1
Sortu nintzela lau hogoi urte aurten orai ditut bete
Osagarria ezin hobea izana dut orai arte
Bizi-molde hau gustatzen eta bihotz bihotzetik maite
Gure Jainkoak luza dezala oinon hola zonbait urte.
2
Ni sortu nintzen etxe maitea Senperen Jaureiko-borda
Hoi noizkoa den badakienik mundu huntan orai nor
Aspaldikoa izana gatik oinon beti xutik horde
Lehen bezala jostetan ari amets egina dut barda.
3
Aitak et'amak ttikitik naute beti mintzatu euskara
Hori izan da amain altzoan ikasi dudan mintzaira
Bertze haurbide ta lagunekin gaten nintzen eskolara
Geroarentzat behar nuela ikasi ere erdara.
4
Mundu huntara etorri nintzen ni hamekagarren sailan
Tarrotu eta ibili ere bertzeak bezala eskolan
Hartako dina ikasi nuen xifretan eta karkulan
Hola haurren ikasten dena ez da ahanzten sekulan.
5
Sor lekua dut Euskal-Herrian herri xarmanta Senpere
Gazte denbora pasatu nuen alegeraki nik ere
Ordutik eta orai artean zernahi urte gan dire
Artetan berritz horra jitea plazer egiten halere.
6
Denak bezala ni ere bainaiz denboran izatu gazte
Gorputza sano, odola bero, jauzia egiten aise
Kantuz artzia gustatzen eta libertimendua maite
Ene gostuko gazte denbora pasatzen sobera fite.
7
Hogoi urtetan hogoi ta zonbait ginen xorteko lagunak
Orai ere daut bihotza pixten orduko oroitzapenak
Gure Jainkoak bilduak ditu bere gana gehienak
Nik jakinean doi doia gare bia gelditzen azkenak.
8
Ene laguna aspaldi baita familatua Urruņan
Nik ere bardin orai aspaldi jarri nintzela Baionan
Bakotxak gure gisa ginuen bizi-moldea atxeman
Bieri zaiku gure denbora sobera fite iragan.
9
Bizi-moldea hobea nahiz sort-herria nuen utzi
Bertzetan ere nota bizi den behar nuela ikusi
Horrek aspaldi du orai bainan sekulan ez dut ahantzi
Orainon ere kantu hauekin igortzen diot goraintzi.
10
Aitak et'amak haurrean naute giristinoki altxatu
Etsenplu ona berek emanez bide onera gidatu
Ahulezia nausitzen eta Jainkoa dut ofentsatu
Xede onenak harturik ere ardura berritz lerratu.
11
Mundu huntako gure denbora denentzat doa emeki
Noiz eta nola finituko den Jainkoak bakarrik daki
Gaizki eginez urriki eta esperantza dut atxiki
Jondoni Petrik naiko dueta zeruko borta ideki.
12
Lau sasoineri konparatzen dut hemen dugun itzulia
Primaderian gazte lorios, udan indarrez betia
Udazkenian itxura ona, bainan flakatzen hasia
Negu bortitza heldu denean akabo gure bizia.