Sorminetan

Zamora, Auxtin (Auxtin)

 1

 Tanka eta tanka,

 bikotza heu joka,

 idurikatzen zaitut begiak minbera.

 Noiz ere barnetik aterako zira?

 2

 Gaur sortzen bazira,

 naski goiz aldera,

 atxemanen nauzu lurrean etzanik,

 zutaz ametsetan oraino bizirik.

 3

 Hil nahi banauzu,

 azkar jo nezazu,

 aingeru belarrak bezala, mozturik,

 udako haizean, joan nedin loraturik.

 4

 Zut nahi banauzu,

 zutaz uts nezazu,

 bien izaiteak zalapartatzean,

 zure lehen hatsak berriz pitz nezadan.

 5

 Suz maiteko zaitut,

 lotuko dauzkitzut:

 zeruko izarrak, barneko munduak,

 ederrez beteak diren gauz guziak.

 6

 Suz maite banauzu,

 erreko nauzkitzu

 gauaren sasiak, putzuen ilunak,

 hil minez beteak diren gauz guziak.

 7

 Argia hastean,

 perlez dirdiretan,

 ihintz-lorea da sorminetan sartzen,

 bai iduzkiarekin ubelez sortzen.

 8

 Entzun urrunean,

 minez marrumetan:

 lurraren ikarak, edoien galernak,

 itsaso uhainen arrapo xuriak!

 9

 Otoi, jalgi zaite,

 ne' baitarik fite!

 hor duzu eguna argitzen hasia,

 hor harrigarria den bizi berria!