Besta berriak Donoztirin
Xaharra
1
Entzun dugu guk ere musika goizean
Herrian bestaberri, gu aldiz etxean
Eri eta xaharrak pena bihotzean
Bainan hemendik gira ari otoitzean.
2
Hasi nauzu ni baitan asmu ta karkulan
Bestaberrik emaiten duela ainitz lan
Beharrik gure Martin hor baita atelan
Erakasle hoberik ez zaiken sekulan.
3
Harritzeko da horrek deraukan morala
Ederki manatzen tu tropa ta korala
Iduri errealki gaztetuz doala
Eskerrak denen partez onhartu ditzala.
4
Hemen behar aipatu jaun ertor berria
Eri, xahar ta gazten kontsolagarria
Ezpainetan zitzaion loratzen irria
Besta bat muntaturik bain xoragarria.
5
Gazteak oro xuriz: nor ez hor ilusi!
Ohore emaiteko ostian Jesusi
Artzain ona, ez zauntzun ez hori itsusi
Vietnamen ez baituzu gauza hoi ikusi.
6
Erretor eta gazte, guziak batean
Bake hortaz'guziek bihotza betean
Ainitz sofriturikan kanpokon artean
Atxik gaitzazu luzaz Krixtoren bakean.
7
Ostia inguratuz, zer gizon lerroa!
Hor du denen fedeak azkartzen erroa
Hor du segurtatuko herriak geroa
Berrituz denen baitan maitasun beroa.
8
Gazteria hori bat, hau da zoriona
Berexkeria baita guzientzat pena
Bide makurrak utziz segitu xuxena
Herrak bazterturikan atxik batasuna.
9
Halaber soldadoak eta kargudunak
Hor agertu baitira berdin fededunak
Otoitzean joanik Jesusen egunak,
Gora bestaberri ta gora euskaldunak.