Emeki: gizonki!
Urkia, Mayi
1
Emazte, emazteki; emakume, eme
Hitz oso ala erdi, lauek elgar maite
Eme: haitztale, hazkor, haur ainitz emaile
Lauek norbaiti zordun agertzen gaituzte.
2
Gizaldi guzietan, lehengo mendetan
Emaztea izan da gizonaren pean
Araiz noiz nola onar Adamen arrazan
Nortasun, indar, fede «giz-hezur» batean?
3
Alabainan «emeki» bietan den bezala
Zonbait han edo hemen xutitu izan dira
Gizon eta emazte bai pare girela
Zertako beraz batek bertzeari mana?
4
Gizonak gorputzean ekartzen du indar
Giro hortan maizenik agertzen da azkar
Emaztea ahatik daiteke bai behar
Lanean harraraziz itsu eta bakar.
5
Bainan handitasuna zertan da ageri
Indartean bakarrik abere iduri?
Ez ote da oraino bertze ainitz aldi
Mila gisaz frogatzen biotz garbieri?
6
Orduan emaztean norbait da ikusten
Bere buru eskuak dituena hezten
Etxen ala kanpoan berdin du egiten
Laneko, asmatzeko ahala finkatzen.
7
Airekoen gidari, minen soleigarri
Eskoletan haurrekin, herri kontseilari
Gaur egun emaztea denetan da hari
Dretxo hori berak du maizenik «idazi»!
8
Ez uste izan otoi ahanzten dutala
Gure berezitasun-izaiteko Ama
Hori hor dugu berme alaber izarra
Nehor edo deusentzat izan gabe traba.
9
Olerki hau eman dut martxoko zortzian
Egun hau omen baita gure ohoretan
Zendako, norendako egun bat urtean?
Ez gaiten guhaur sartu huts hortan berean!
10
Emazte ala gizon, haur, xume (e)do konkor
Ahul guziez gare sobera ahanzkor
Nola ahulena den argi bat ekarkor
Egun oroz «gizonki» dugun hori aitor!