Uda azkena

Uranga, Juan Ignazio

 Artoak orain asitzen dira,

 Sustraiyetatik nekatzen,

 Zutikan ozta daude guztiyak

 Duten burua jasotzen;

 Sustrai ondotik ikusten dira

 Nola diraden gorritzen,

 Egun batetik bestera dira

 Indar galdurik gelditzen.

 Arbolak ere bota dituzte

 Beren gañeko orriyak,

 Arrastatuaz lurrean dabiltz

 Igarturikan guztiyak;

 Larrugorritzen asitzen dira

 Mendiko arbol aundiyak,

 Eta igeska joaten dirade

 Gure chori kantariyak.

 Belar onduak biltzen dirade

 Eta eraman ganbara,

 Bei gaisuai eramateko

 Neguan beren askara:

 Era onetan ondo jan eta

 Izango dute indarra,

 Ez da izango aben laguntza

 Nekazarientzat charra.

 Isiltzen dira kirkirrak eta

 Gordetzen da chingurriya,

 Enadak ere topatu nai du

 Beretzat toki berriya:

 Okerturikan dago artoa

 Lurreraño eroriya,

 Zelai ta chara guztiyak daude

 Larrugorriturik iya.

 Sagar aleak erortzen dira

 Arbol-gañetik lurrera,

 Pilla eginta jasotzen dira

 Guztiyak saski batera;

 Beresi eta sartzen dirade

 Abek danak tolarera,

 Uda azken onak au du ekartzen

 Nekazarien echera.