Udaberria
1
Goizean goiz esnatu naiz gaur
hain zuzen ere bostetan
Egun sentiko txori goiztarra
nabaitu baitut hizketan
Zeru aldera begiratuta
izar alde guzietan
jaikita gero mendian gora
egun sendiko intzetan
Mendi gaiņetik udaberria
mireskatze ustetan.
2
Sortaldetikan azaldu zaigu
eduzki gorri gorria
lano bat ere ezta ageri
zerua guztiz garbia.
Baso ta mendi, soro zelaitan
piztu da bizi berria
Zugaitzak ostoz, txoriak kantuz
hauxe da udaberria.
Pakea eta osasunakin
bedi ongi-etorria.
3
Igo aldi bat eginta gero
iturri gardena pil pil
basauntz haundi bat hor ikusten det
iturritik oso hurbil
iduzki printzak berotutzean
ur fresko billa alabil
eiztariaren beldurrik gabe
patxara ederren dabil.
Kaleetan gaur gizasemea
ezta zu bezain trankil.
4
Gore ta gora nijoalarik
iritxi da mendi gaiņa
lau aidetara begiratzeko
hau da leku atsegiņa.
Zeruak eta itxasoak gaur
hain dute margo urdiņa
basoak eder, zelaia berriz
lorategi bat egiņa
Euskal-Herria dirudizu zuk
Paradisoain berdina.
5
Urrezko margoz eduzkia ta
aizea berriz hegoa
osto orlegiz edertu zaigu
arkaitz gaiņeko pagoa.
Udaberrian iruditzen zait
guztia ederragoa
baiņa zer diot, ezta azaldu
piņu beltzaren leloa
Udaberria iritxiarren
hau degu beti lengoa.
6
Sagar zugaitzek eskaintzen dute
beren loreen usaia
igali zugaitz denak loretan
hau urte sasoi alaia
Ostoai ere iritxi zaie
zabaldutzeko garaia.
Txoriak berriz adar gaiņetan
abestuaz... Aleluia
Ardi ta zakur menditan gora
pozez dijoa artzaia.
7
Begira gure belardiari
ai zer itxura daukana
esan diteke belar guziek
badutela lore bana.
Lore gaiņetan erle gaixoak
egiten du bere lana
ahoz gozatu, hanketan hartu
bildu gerorako jana
Gero neguan billatuko da
orain pillatutzen dana.
8
Zugaitz azpiko gerizatikan
oska hasi da kukua
udaberriak sendatu ditu
len zegoana mutua.
Kuku ta kuku, esnatu nai du
lotan dagoen lekua
Udazkenean eta neguan
egingo luke ujua.
Urte guzia izango balitz
garai hau bezalakua.
9
Txori batzuek abesten eta
besteak lanen jo ta ke
kabi bat goxo eta pollita
moldatu nahi lukete.
Naiz ta lanean gogotik jardun
hoientzako ezta neke
eta guztia beren umeak
ondo ikustean truke.
Zer ikasbide emaiten duten
ikasi nai bagenduke!
10
Atsegiņa de txoriak hala
kusitzea lanean
leialtasunik haundienean
elkarren maitasunean
Udaberriak maitetasuna
hala sortu duanean
txori, hegazti, abere eta
xomorroen barrenean.
Pake giro bat sortuko al du
guretzako azkenean.
11
Aratsa dator, eduzki printzak
badoaz izkutatzera.
Izaki dana ikasi det gaur
xamur eta bihotz-bera.
Egun argia pasa denean
gaua datorren antzera
pozaldiaren ondorenean
naigabea det atzera.
Udaberrian Euskal-Herria
bihotz berritzen ote da?
12
Udaberria, zu izan arren
maitasunaren izarra
Euskal-Herriko giroa dago
neguan bezain zakarra
Maitasun dana desegindu de
gorrotoak du indarra
Hauxe bai dala samingarria
hau bai dala negarra
Udaberria iritxi eta
neguan bizi beharra.
