Mattinek Irisarriri
Treku, Mattin (Mattin)
1
Gaur jeikitzean, Eguerri goiza, idekitzean atea
Zuri pentsatzen egotua naiz, oi! Irisarri maitea
Ezin jasanez hemen ari naiz, penaren karga dorpea
Kontsolatzeko gogaratu zait, Jesus haurraren sortzea.
2
Argitasun bat atera nahiz, nere ideia beltzetik
Zuri kantari hemeni ari naiz, aratseraino goizetik
Pertsu berri hauk moldatu ditut zuretako bihotzetik
Irisarrirat goraintzi batzu, igortzeko Ahetzetik.
3
Erdi erdian ordoki eta, inguruetan mendia
Hazkuntza eta laborantzako, zer toki xoragarria!
Beti zintzaki jokatzen baita, hor bizi den gazteria
Maitatzen dute eskuara eta, maitatzen dute herria.
4
Asko herritan pertsu saioak ari omen dira galtzen
Ta Irisarrin oraino ere aintzina dute segitzen
Apez berria pertsuzalea nola dutan ezagutzen
Aurten saiorik etzela izanen, ez zizaitan iduritzen.
5
Erretirua hartu beharra dadukagu zahartzera
Osagarria mendratu eta, etxetik ezin atera
Bainan gauza hau, sartu nai nuke, gazte hoien bihotzera
Euskal-Herriko usaia onak, ez otoi utzi galtzera.
6
Aspaldixkoan usaia.nuen, ospatzeko Eguberri
Zuen herrirat etorri eta, lagun artean kantari
Gaur ere gagoz hor nago bainan, gorputzez ezin etorri.
Agur bihotzez Irisartarrak, eta agur Irisarri...
7
Ene burua ezarria dut mediku hoien artean
Ez jakin nere onetan ala neretzateko kaltean
Desira hauxe egiten zauztet, bihotza bete betean
Gure Jainkoak ni uzten banau bizirikan bitartean
Berriro ere etorriko naiz horrat helduden urtean.