Hegoa
Toucoulet, P.
1
Urria heldu denean,
Dantzan noa goiz aldean,
Airos mendien artean.
«Hegoa» naute deitzen gizonek,
Hego aldean sortzean
Baitut nik, uste gabean,
Bildu hangoko labean
Berotasun sabelean.
2
Ene hats bero goxoak
Kasatzen ditu lanoak,
Alegeratzen gogoak.
«Hego xuria» ni langilea:
Arintzen ditut zangoak,
Argitzen haizpe xokoak
Dirdiratzen urrungoak,
Garbitzen mendi lepoak.
3
Denak garbi eta xuri
Eskaintzen ditut deneri,
Lurrak zerua iduri,
Hego xuriak emaiten oino
Urzoa urrun ageri;
Nahi baduzu bazkari,
Emozu tiro berari
Ni zuretzat musikari.
4
Ekartzen dutan beroak
Emaiten du koloreak
Urrea idurikoak.
Tindaria naiz ta dendaria!
Arbol guzien hostoak
Moltxotzen ditut osoak
Lurrari hetaz goxoak
Egiteko gerrikoak.
5
Noiz baita lurra egarri,
Hartaz bainaiz urrikari
Dei diot mendebalari.
«Hego xuriak» adios dener,
Ihes noa euriari,
Nitan dutan beroari,
Zor baitiot gaixoari
Nintzan denen zerbitzari.
|