Egun on, amatto!
1
Agur, munduko amak! Agur, agur t'erdi!
Agur, nere amatto, hila hoin aspaldi!
Agur, ama beltx eta, gorri, xuri, hori!
Agur, ama guziak! Ohore zueri!
2
Zuen bihotza daukat xoriño-ohantze.
Zuen begitartea, irailaren pare.
Zuen bular nasaia, ibai eta leize:
Amodio su-garrek zitzaiztela erre!
3
Orroit zira amatto: aldi bakarra zen,
Elgarrekin egonik plaian Miarritzen...
Hor nabila umexurtx, eta zu beti «zen»:
Plaia jendez mukurru: ama, nehor etzen.
4
Etxen zu zinen argi, aita zela itzain.
Bihoz-dun zinen, ama, artos ta dena zain...
Ni hemen nekez ari zuk ikasien zain,
Bainan lehian, ama, ontzeko zu bezain.
5
Zure heriotzea aintzin-ametsetan
Pairatu dut gau oroz, ama, nigarretan!
Ez badut ihardoki azken oinazetan,
Barka, nere amatto barka aldi huntan!
6
Agur, hiltzalen amak ohoin eta bertzen!
Agur, etxeko ama, nun haurra hila den!
Geldi ahalaz laster nigarretik, ezen
Kristo, ohoina lagun, dabil beti lerden!
7
Ama Birjina eta Madalena-Mari,
Dei bat dautzuet egun, kartsua, bieri:
Emozuete, otoi, munduko amer!
Itzul diten nigarrak lore eta irri.
8
Eskualdun amak, agur! Ez ditake usu
Zuek bezain pollitik. Horra dener musu
Egun nahi zaituztet berex ohoratu
Eta amodioaz zuer egin kantu.
9
Oi amek badakite zoin malte ditugun,
Ez lukete gogoa griñan eta ilun.
Hauxe adi-zazue semen partez egun:
Ama bat ez zait aski, nahi nuzke ehun!