Euskara ikas eta mintza
Sorhouet, Maurice
1
Trixtatzen hasia da jende Euskalduna
Mintzaiaren gainerat jaustean iluna
Ez da atsegingarri gertatzen zaukuna
Hirriskuan baitugu gure nortasuna
Diruz erosten ahal ez den ontasuna.
2
Egon gabe guziak trixte eta ilun
Izan gaiten langile, nagusi, kargudun
Bagirare segurik zinezko Euskaldun
Gure gogo bihotzer galdegin dezagun
Jo gaituen malurraz nor garen hobendun.
3
Euskara zu maitatuz baigaituzte hazi
Ez zaitugu ez nahi hor hiltzerat utzi
Zutaz ukan presenta ezin da ahantzi
Haurrer nahi ginduke konpreni arazi
Zu itzal eta, urus ez daikela bizi.
4
Sortzeko ordu hartan nor da Euskaldunik
Amak euskaraz mintzo entzun ez duenik
Maitasuna hedatuz bihotz barna danik
Zonbat da beraz gutan on har dezakenik
Berexten ahal dela Euskararen ganik.
5
Bada artetan zonbeit kontseilu emaile
Erdaraz mintzo denik Euskararen alde
Horiek entzun eta frango jaukitzaile
Ez bada nahi izan hortaz mintzatzaile
Nola ager daiteken horren salbatzaile.
6
Haziek erein behar beren sasoinetan
Mintzaiak erakutsi hastetik etxetan
Haurra amak daukala here besoetan
Handitzean trebatuz gero eskoletan
Euskara ikasten da mila lorietan.
7
Jaun andereak orai bi hitz zuer buruz
Hizkuntza ahultzeaz zaiztenak malerus
Zuen griņa horiek ez utzi ele huts
Atxikimendu hori obretan erakuts
Euskalduner bederen euskaraz mintzatuz.
8
Haur gaztea gogoak zu ganat nerama
Hizkuntzaren zaintzeko zutan dugu harma
Horren salbatzeari gazte danik berma
Amultsuki maitatuz zuk bigarren Ama
Arrapiztuko baita Euskararen fama.
