Gure jaun bikarioa
Sempertar gazte bat
1
Gure jaun bikario denez maitatua,
Parropia baterat da izendatua;
Han Game-Zihigan du erretor lekua;
Urrun izanik ere da: kontserbatua...
2
Ehun Sempertar baino hainitz gehiago
Partitu ginen goizik Gamerat heltzeko.
Sartuz Donazaharren han zerbeit hartzeko.
Holachet heldu ginen behar tenoreko.
3
Hango jaun auzaphezak ongi ethorria
Egin zion hitz aldi bat hunkigarria.
Proosinoan kantuz jendetze guzia
Sartu dugu elizan jaun ertor berria.
4
Hango jaun Doyenaren hitz aldi sarkorra.
Asko begiek zuten ichuri nigarra.
Ertor berria ez zen ichilik beharra;
Dener bihurtu zaukun milaka eskerra.
5
Guziek bat eginez: gazte-ta zaharrak,
Bihurtzen dauzkitzugu nork gure eskerrak.
Zuk ibili ditutzun urhats ez alferrak
Ez ditu ahantziko nihoiz sempertarrak.
6
Zu jaun erretor berri on eta maitea.
Izanen ahal duzu ona suertea.
Egun batez jotzeko zeruko athea,
Osorik han duzula zure arthaldea...
7
Jaun bikari berria ongi ethorria;
Donazahar herritik Jainkoak egorria,
Behar duzu lagundu jaun ertor maitia
Chahar eta gazteri egiten ongia.
8
Zombeit egun bakarrik ditugu munduan,
Nekez iragaiteko lan eta guduan.
Jainkoak eman dauzku gure inguruan:
Aphezak gidaritzat sar gaiten zeruan!...