Axular'en eguna
Sempertar gazte bat
1
Hogoigarren mendeko berroit-hamaseia.
Bi bertsu moldatzeko orai dut ideia.
Egun bat iragan da ezin ahantzia
Buruileko igande bat bederatzia
Norbeit ohoratzeko egun berezia
2
Norbeit hori: Axular Aphez famatua.
Urdazubin sortua, Tarben apheztua.
Hainitz ikas-etchetan zen eskolatua;
Jaun Erretor izan zen Sararat deitua
Obrak eginik zuen han utzi mundua.
3
Haren obretarik bat nahi dut aiphatu.
Gutaz orhoituz zuen «Gero» ichkribatu
Hir-hogoi kapitulu barnean baditu.
Dena argi, abisu, nola gobernatu.
Zuhur den eskualdunak dezan irakurtu.
4
Hitz mamitsuz lantua du barne guzia.
Aiphatuz juramentu-ta alferkeria,
Denek behar dugula in penitentzia,
Gaizki haundia dela urguilu hartzia,
Arimaren galgarri den lohikeria.
5
Egun hortan Axular Sarako herrian,
Ginuen ohoratu han meza nausian.
Narbaitz jaun kalonjeak eskuara garbian,
Erran zaukun lañoki: Oi Eskual-Herrian,
Nor izan zen Axular bai bizi guzian.
6
Juan ginen trinketera bilkura batera.
Lehenik mintzatu zen Herriko jaun mera,
Segidan Dassance jaunak du goretsi Sara,
Jaun Labaien entzuten kontent egon gira,
Azken jaun aphez Laffitte «Geroz» mintzatu da.
7
Eskualzalen-Biltzarrak zuen moldatua.
Kobla sariketa bat arras funtsezkua:
Axularren omenaz nork idaz bertsua.
Dassance jaunak eman du cheheki kondua;
Noren lana nola den han jujatua.
8
Bazen egina: bertsu bai eta olerki.
Nork bere heinean du Axular goretsi.
Milesker bat nik zor dut sari emaileri.
Nik egin lanak baitu zerbeit irabazi.
Gora Eskuara eta bethi bedi bizi.
9
Ez nintzen trinketean arhatsalde hartan.
Beraz ez ditut entzun Mattin-ta pertsutan,
Basarri-ta Chatbador bethi berdin fleitan.
Zer pertsuak duzketen eman trinket hortan.
Hek ere gu bezala ziren sariketan.
10
Neure ados laguna: Basurko Irundar.
Zer diozun, zintuzke koblak eman behar.
Denak eskualdun gare, dugun adi elgar.
Gure bihotza baita dena su eta kar,
Kanta dezagun: gora, bai gora Axular!...