Suiet eder bat
Saratarra
1
Suis eder bat deklaratzen dut,
gaztek esenplu hartzeko.
Amodioa zein den lanjeros
gazterik hari lotzeko.
Izar eder bat hautatu nuen
eder guzien arteko.
Bihotz-erdirat sartu ondoan,
ez baitzait atheratuko.
2
Amodioa sortu berrian
gaztien xoragarria:
Hamabortz urte konplitu gabe
emana nuen fedia.
Geroztik beti gomendatzen dut
Zeruko Jainko maitia,
Beira dezagun bien arteko
konfidentzia guzia.
3
Amodiorik gabe dagonak
penak zer diren ez daki.
Ni aspaldian, giza-gaixoa,
atakatzen nau borthizki.
Ene maitia, kontsolatzeko,
ardura nahi ikhusi:
«Zu bistan gabe, ni mundu huntan
ez naiteke luze bizi!»
4
- «Ene maitia, arrozoin duzu,
ez gare luzaz biziko,
Guk behar baino sei urthe lehen
baigare tonban sartuko!»
- «Azkenaz goiti ez othe dugu
baimenik autenituko?
Ez othe dire zure aitamak
gu biez urrikalduko?»
5
«Bai zazpi urte pasatu tugu
biak elgarren agrados;
Hargatik laster tristatu ginen
aitamek jakinez geroz.
Amodioa, gauza handia!
diruz ez daiteke eros:
Horra zergatik aurkitzen garen
biak bethikotz maluros!»
6
Menturaz nue aitaren ganik
nik hori nuen merezi,
Zeren zaitudan guzietarik
espos-laguntzat berezi.
Desterraturik igortzen naute
zure menetik ihesi
Zure ganako amodioa
nahiz arras utz-arazi.
7
Despegidarik ez dirot eman,
maitia, zure ahalkez.
Maite nauzula ez dut dudarik
zure aita-amen partez.
Dudarik gabe ez ziren kontent
gure arteko manerez:
Xangrinen pean gu bizitzeco
sortuak gare arauez.
8
- Partitze huntan abiatzen zait
begietarik nigarra.
Adios beraz bethierekotz,
oi ene bihotz leiala.
Aperentziaz etzinteken zu
enekin bizi beharra.
Jaun zerukoak hauta dezala
zuk behar duzun senharra.
9
- Ez ahal zazi nere uztera
zazpi urtheren buruan,
Gure manerak biek elgarri
deklaratu tugunian?
Jakin-ezazu ez dela sartzen
fede-ukorik zeruan:
Nik zutaz bertze espos-lagunik
ez dut harturen munduan!
10
- Fidelitate handian eta
birjinitate garbian,
Bertute hoitan beiratu gare
gure denbora guzian!
Okasionetik ihes eginez
ahal bezanbat munduan,
Eternitatian lorios nahiz
hil-eta parabisuan.