Urteak
Salaberry, Etienne Joseph (So Egilea)
1
Hegalak bezela urteak.
Hegalak iduri, hain laster baitira lerratzen,
Hegalak iduri, hain laster baitira itzaltzen,
Hegalak emeiten, zorigaitzez, urteak.
Hegal arin urtea.
Hegala bezain miresgarri,
Hegala bezain enganagarri,
Hegala bezain lotsagarri.
Hegalak mozten ditu lanhoak
Haichtur chorrotch baita hegala.
Dendari zeruan choria, bere hegal zalhuekin.
Bainan hegala iragan orduko
Bainan hegala gorde gabe.
Lanhoa lotzen da lanhoari.
Lanhoak gordetzen du iguzki su ziphua
Ez baita nihundik ageri
Hegalaren piko-sarrasta.
2
Uda azkenean, haundi-haundia dago.
Dago haitza, hosto gorhailez estalia.
Andaluzia guzian, ez ditake liranja arbolerik,
Sager urhez, mukurru bethea,
Ez ditake joan dezakeenik
Haitzari Eskual-Herrian,
Haitzari hosto gorhailez argitua.
Bainan Ipar aldetik jauzi da haizea,
Eta ebatsiko ditu hosto gorail liranjak.
Hartu ditu, ebatsi, pirripitan eraman
Lohiarekin nahasteko, mutur ukaldika.
Uda-azkenaren ondotik; negua.
Haitz murritz buluziak
Zeruari buruz
Haitz ezinduak luzatzen ditu abar meheak
Bele bat, ikatz mokor, kokatu zaio egurrean geldi
Bildurik hegalak.
3
Jauna, urrikal zaite, zure haur gizonaz,
Neguko belea baino gehiago
Nehor ez baita orhoituko, haren urhatsez.
Nigar, lan eta irri
Oro dauzka berdin deseginik beleak
Begi hetsien barneko ilhumbean.
Eta gure urteak, Jauna, gure urteak hegal,
Baitoazi, egunetik egunerat,
Et atchikiak, ezin baratuak
Oldar zalapartan.
Ez dabiltza lasterrago, choriak igeri
Bi hegal miko eginak, lanho itsasoan.