Mundua kexu
R.C.
1
Agerkari bat ideki-ordu ikusten dugu garbiki
Mundu honetan gauza guziak ez doatzila laņoki,
Hemen gudua han berriz herra, ezin-jasanak nasaiki...
Horiek entzun eta ikusiz nola bizi gu goxoki.
2
Lehen-lehenik aipa dezagun Vietnameko gudua...
Zendako bada jende horier, denek hauts bada burua?
Aspaldi-danik hil beharra da Amerikanoen sua,
Vietnamdarrak etxean utziz, huts dezatela lekua!
3
Vietnamdarren ondo-ondotik huna Biafra trixtea
Gutarik urrun beltz-erresuman Afrikan nunbait gordea.
Horren zorigaitz ezin-jasana dakigu dela gosea.
Noiz ukanen du Biafra horrek gogo-gorputzen asea?
4
Nahi ginuke jakin garbiki nolaz Txekozlobakian
Rusoen tankak gau-eta egun dagotzin bide hegian.
Guziak ziren libertatean Herri zintzo ta garbian...
Zer gatik bada Ruso horiek ez utz jendeak bakean?
5
Jainko beraren semeak dire Ipar-Irlanda gaixoan
Bainan halere elgarren etsai gudua dute gogoan.
Karriketan su gizonak hilak, heien auzia: zilkoan.
Ta sinesterik behar ote da Amodiozko Jainkoan?
6
Horiek hala gu Euskaldunak mintza gaitezen gizonki
Bertze herrien zorigaixtoek bihotza daukute hunki.
Gure kasuak emaiten dauku ainitz bihotz-min segurki
Guhaurek ere ez baitakigu salbamendua nun aurki.
7
Ipar-Euskadin nexka gazteak hiri handirat badoaz
Dakitelakotz sortu herrian ez ditakela irabaz.
Eta mutilak beldurrez daude orroituz beren ezkontzaz...
Arrotz horiek dira jabetzen gure nexka pollitetaz!
8
Hego-Euskadin bertzerik bada; hango bizia samina
Frankismoaren azpi-azpian itoa da Euskalduna!
Gure anaiek presondegian omen dute toki ona...
Pairamenetan egon-ondoan badator azkatasuna!
9
Bertsu xume hau izan dadien Euskaldun baten oihua
Idek beharri, entzun garbiki: nun da Euskal-populu?
Ez mintza denak. Egon emeki. Nork du luzatzen eskua?
Hala segituz, jakin zazue, galdua dugu gudua!
10
Mundua kexu? Nor da hobendun? Ikus dezagun garbiki;
Herri-nausiek-uzten dutea azkatasuna ausarki?
Ala gezurrez eta indarrez nahi dute ihardoki?...
Jakin bezate, goiz edo berant, egia dator bortizki!