Nunbaitik ikusiz
Piarre, Otto
1
Norbaitek igorri daut bihotz-altxagarri
Azau bat kantu eder zahar eta berri
Kantarazi dituzte Marticorenari
Deitura hortan gordez Erramun Otsobi
2
Erramun hiri diat kantu hau emaiten
Urrundik adi nezak: Biba hi! erraiten
Biba bi zeren baituk Baigorri goresten
Aspaldi maite dudan aire bat altxatzen
3
Jainkoak manatua atxikimendua
Arima herratuak hori dik galdua
Lur huntan berean duk gozatzen zerua
Bihotzez maite baduk hire sor-lekua.
4
Sortzean etxekoak hiltzean Jainkoa
Hori duk amodio baitezpadakoa
Errotik loreraino izerditzekoa
Herriak emanen dauk negu-gabekoa.
5
Ikusi dudalarik Iparla hoin xuri
Enetzat bihotzean sartu uda-berri
Ikusiz amentsean zer bi loretegi
Baigorrin Bastida'ta Bidarrain Ganharri.
6
Kanta'zak beraz kanta, kanta'zak Erramun
Kanta'zak irratian ahal bezain urrun
Herritik kanpo gituk hoinbertze euskaldun
Eskuaraz kantatzea ahantz ez dezagun.