Jutsitik joan den M. Carricart apezari
Oztibarretik
1
Penaturikan naiz abiatzen egun hemen kantatzera
Orai sujeta jeutsi baitzeraut neri uste gabetara
Zinez bihotzez hunkitua da egun huntan herritarra
Ezin sinetsiz gelditu gira, Mixel, zure joaitera.
2
Bai, bederatzi urte zurekin alegrantzian pasatu
Gure herriko arima zinen, ezin baitugu ukatu
Urte hoietan etzen posible herria zadin lokartu
Ernetasuna zu baitan zagon nor ote ez da ohartu.
3
Carricart jauna, egin duzuna ez izanen ahantzirik
Elizan kantuz ariko gira apaletik bai goratik
Zuk erakasi aire ederrak ez dauzkagu ahantzirik
Meza denboran heiek kantatuz zu ez galduko gogotik.
4
Hemen zinauden urte hoietan elizak dira edertu
Lagunekilan zuk baitaukuzu azkar hortan parte hartu
Kapabletasun hori baituzu ongi eta klar agertu
Erdi hutsirik egon ditezen laiteke zinez bekatu.
5
Herri huntako gazteria zuk ederki duzu moldatu
Euskal liturgi irakurtzeko ongi baitira trebatu
Herriarentzat geroa baita gisa hortan segurtatu
Euskaldungoa eta fedea behar ditugu salbatu.
6
Ez dakiguna orai zer gisaz nola erremestiatu
Zure laguntzak gure alderat ez baititutzu izartu
Behar orduzko mementoetan ainitz gaituzu gastatu
Aldiz zuk gure lazakeriak jasan eta soportatu.
7
Nola ez trixta gure bihotza bertze gauza batek ere
Begitan nigar jausten baitzeraut nik aipatzean Mugerre
Orroitzapena txarra izanki herri hortaz haladere
Frantxua Salla (1) gure lagunaz bihozmin batekin gaude.
8
Oztibarreko aldetik zira Lapurdirat zu abian
Gure xokoa atxik gogoan eta beti bihotzian
Orai bezenbat erne zu egon ta luzaz osagarrian
Milesker beraz bihotz bihotzez, berriz ikusi artian.