Bizkaian dogu eskola eder bat

Ormaetxe, Juan

 1.

 Bizkaian dogu eskola eder bat

 Bilbon jarrita: Euskaltzaindi!

 Au ikusiaz alaituten da,

 Txori toki bat dirudi!

 Egun danetan beterik dago,

 Ori bai dala pozgarri;

 Illuntzeetan bete-beterik

 Ta txori ama kantari.

 II.

 Asaba zarrak lotan dirade,

 Semiak dira ixartuta;

 Egal danetan Udabarriko

 Txiruliruli kantaka.

 Arbola eder bai Bilbon daukie

 Eurak kabitzat artula;

 Zein da guraso poztuko ez dana

 Semiak ola ikusita.

 III.

 Lotan egon dan gaixo bat legez

 Barrua gora goraka,

 Ixartueran bere amari

 Pozez beterik mosuka.

 Ama gaixoa biotz alaiaz

 Baita semiai besarka

 Ikusirikan lumaz jantzita

 Asi dirala egazka.

 IV.

 Txori kabia politagorik

 Ezin leiteke aurkitu,

 Gure txindorrak bere kumiak

 Oso oso maite ditu.

 Arriskurikan ikusten badau

 Egalpian sartzen ditu

 Miru etsaiak bere erpakaz

 Egin ezteiozan ostu.

 V.

 Negu gogorra ganian dogu

 Uda gozua amaiturik,

 Gure mendi ta zelaiak laster

 Edurragaz zuriturik.

 Teillapetxu bat biar dabie

 Oiz gogorrak galdu barik

 Udabarrian geratu ezkaiten

 Txoritxuen kanta barik.

 VI.

 Lengo domekan Astrabuduan

 Nintzan meza entzutera,

 Antxe ikus nitun, neska la mutil

 Neba ta arreben antzera,

 Euren auzoko gazte bateri

 Il agurra emotera;

 Axe bai zala Euskalerriko

 Antxiñako oitura!

 VII.

 Aren ostian jaia polita

 Zeruetako antzian,

 Aurresku eta jantza garbiak

 alboko zelai erdian.

 Kanta guztiak ta erreguak

 Zirean euskera utsian,

 Zeruak bere ola artzen dabe

 Aingerua doanian.

 VIII.

 Agur Astraudu ta agur Alpontso,

 Agur il dan gaztiari,

 Biotz barruti erregua egin

 Aiztu barikan oneri.

 Laguntasuna aren bitartez

 Goian daukagun amari

 Sendotu eta indarra emon

 Deion gure euskereari.