Heriotzaren beldurrean. Sinisgabearen dolamena
Amentslari
1
Orain arte eginik hainbat kantu mota
Laurogoi-ta laugarren urte mugak jo-ta
Zabaldu nahi duke bertsu hauer borta
Daukatan auhen-mina nahi baitut bota.
2
Trixterik nabilala negu eta uda
Kantatzeaz eginik mila duda muda
Iragan behar dela zeru lurren muga
Nitan den trixtezia hortarik heldu da?
3
Olentzerotan erretx du haurrak sinesten
Haur denborako gauak ederrak zinezten
Mundua ez dut begi berdinez miresten
Hortakotz hasia nau trixturak iresten!
4
Arkume hil bat nuen lurpean emana
Atzo berriz joan izan bainaiz haren gara
Hezur hutzek jo dute nere bihotz barna
Begietan naukala nigar xorta bana.
5
Haragiz gabeturik hezurrak zoin prestu
Guretzat berdin dela pentsua nork ez-tu
Ez aitortu nahiań gabiltz dena jestu
Etzaidazula aitor emadazu esku.
6
Abar eiharra ez da sekulan hostatzen
Hau onestea nori etzaio gostatzen
Haur ttipi bat bezala banintz Jainkostatzen
Trixtezia nerekin ez laike jostatzen!
7
Denek hil behar dugu da gauza jakina
Askoz hobe zitaken sortu ez bagina
Bainan deus ezin dugu goazen aintzina
Hiltzeak estal beza deremagun mina.
8
Haurrean nitan zagon itxaropen gatza
Ez da berdina gaurko soinuaren latza
Heriotza ez dela denen akabantza
Sinesten duen batek ez du guti xantza!
9
Zendako xantza horri nabila iheska
Nitan ez bailitake den bezenbat kezka
Batzu bezala berriz banadi fedesta
Akaba litzaidake trixturaren pesta.
10
Haurreko lore hure nitan zen zimeldu
Daukatan zoritxarra hortarik da heldu
Damatan etsimenak bururantzik ez du
Gizon adimenduak zentzua dent kendu.
11
Hargatik ilunki dut ikusten mundua
Zeruari nitzaio hainbat urrundua
Argi eskasez nago bernez ilundua
Hobendun bakarra da ner'adimendua.
12
Zertaratua nauzun adimendu hitsa
Nitarik kendu duzu argiaren hitza
Zer debru egin duzu? mintza zaite mintza
Nun gorde duzu ene fedearen giltza?
