Jakin dedanez laxter ditugu

Olea, Inozenzio

 -1-

 Jakin dedanez laxter ditugu

 berriro bertsolariak

 Euskalerriak -maite dituan

 txori polit kantariak

 noiz nai eztira entzun izandu

 ain berri jostalariak

 itxuratutzen asi baitira

 jartzen zaizkaten sariak.

 -2-

 Bertsolariak dezaketena

 edozeiñek nola egiñ?

 Au askok uste badute ere

 asi ta iñola eziñ

 gure Jainkoak ez gaitu noski

 doaiz danok jantzi berdiñ,

 oiek artixta batzuk dirala

 esan nai nuke onekiñ.

 -3-

 Gaur egunean zenbait artixta

 dabiltza pitxiz jantzita

 ta gizartean goi-goieneko

 malla ura iritxita.

 Bertsolariak sari kontuan

 zerbait alde bat utzita

 baña besteak ainbat badira,

 egon gindezke etsita.

 -4-

 Ez aldituzte artzen askotan

 zurikeri aunditxuak

 gaur eguneko kitarrajole

 illeluze bizartsuak?

 Ainbat garrantzi baldinbadute

 oien karraxi txatxuak,

 zenbat balio dute euskaldun

 gizon jatorren bertsuak?

 -5-

 Gizon trebien billa gabiltza

 urrutietan askotan

 geure etxian eduki arren

 aukerik asko prankotan,

 Ia esnatu garaia degu

 sekula esnatzekotan.

 Euskal artixtak nork estimatu

 guk ez estimatzekotan?

 -6-

 Sariketa bat gauz estua da,

 eta, daukan arrixkua?

 Len egindako danak galtzeko

 ai zer irrixtalekua!

 Bertsolariak bidezko dute

 ordaiñ bat itxurazkua

 maite zaitugu esate ori

 bakarrik ezta naikua.

 -7-

 Sakon ta alai, trebe ta apal,

 au da arritzekoena

 berak izanik gure doaitan

 dan arrigarrizkoena.

 Euskeragatik egin duana

 lanik baliozkoena,

 al dan añean saritzea da

 eskerrik egizkoena.

 -8-

 Gaitasun billa baldin bagabiltz

 jarri sariak aukeran.

 Goi-mallan egon bearrekuak

 zertarako utzi beran?

 Nik biotzean au nabaitzen det

 zalantz alai baten eran:

 Etxeko gauzak aintzat artutzen

 ia oraiñ asi geran?

 -9-

 Eguzki epel, goxo, biguna

 badator bertso zelaira.

 Ez ote gera ia iritxi

 une pozgarri alaira,

 urrezko orri-alde bikaiñ bat

 idatziko dan garaira?

 Oraintxe asi gera apaintzen

 bertsolarien kondaira.

 -10-

 Al duten oien artean ere

 badaude bertso zaleak

 ta erakutsi dutenez gure

 oitura zar maitaleak,

 konturatuak bertsolariak

 eztirala eskaleak;

 baizikan gure euskal arraza

 onen berri emaleak.

 -11-

 Antziñatikan gaur egun arte

 belaunetik belaunera

 bertsolarien besotan dator

 gure euskal-izaera

 Arritzekua al da guk oiei

 lagundu nai izatera,

 asmo on eta esku zabalez

 danok irtenez bidera?

 -12-

 Bere artixtak beti goraldu

 izan ditu sorterriak

 antziñatikan datorzkigunak

 dira gauz onen berriak.

 Nortasun alde ola jokatu

 badute beste erriak,

 beste ainbeste zergatik eztu

 egingo Euskalerriak?