Bertso berriak

Olea, J.[I.]

 -1-

 Oraiñ aldian Holandatikan

 eltzen zaizkigun berriak,

 ez dakit izan ote litezken

 danak oso pozgarriak.

 Apaizak ere ezkondu-nairik

 omen dauzkagu jarriak,

 nunbait ez jakiñ ezkon-ondoren

 sortu oi diran larriak.

 -2-

 Nola arraio jo ote ditu

 alde ortako aiziak?

 Ni bai arritu apaiz jaun oiek

 sortu dituzten auziak!

 Gorputzak eziñ errenditurik

 ote dabiltza guziak?

 Lengo indarrik ez al du oraiñ

 Jaungoikoaren graziak?

 -3-

 Ia urtetan sartua naiz ta

 zerbait ikusitakua,

 erabaki bat eman nai bada

 bear dan bezelakua:

 Gorputz onixe etzaio beti

 errez ematen naikua,

 ezkondu arren bizitza ez da

 arrosa kolorekua.

 -4-

 Maitetasuna azaldu bear

 nolabait era alkarri,

 baiña aurrea goxua bada

 atzea mikatza sarri.

 Gauezko lana nolakua dan

 egunez begira jarri,

 Traba bat kendu al dan moduan

 ta zazpi milla ezarri.

 -5-

 Apaiz askotxo aztoraturik

 Holandan gaur egunean,

 ez jakiñ bati zer datorkion

 esposatzen dan unean.

 Ase-eziñak baldin bagera

 anka libre degunean,

 komeri latzak izango dira

 larrak eltzen digunean.

 -6-

 Apaizak ere zalantz-aldiak

 nola dituzten izaten,

 Aita Santuak epai eman du

 argia izan dezaten.

 Zenbait kutizi bete eziñak

 lanak dizkigu ematen,

 baiña andreak ere badaki

 ederki ezetz esaten.

 -7-

 Entzun izan det ezkontzerako

 jarri bear dala ero,

 Holandan ere esaera au

 jakingo da onuzkero.

 Apaizak ere pasatu bear

 makiñatxo bat otz-bero,

 ezkonduentzat dauden ordenak

 benetan artu ezkero.

 -8-

 Andreak ez du senarra artzen

 beti goxo itzegiñez,

 ixilik ere gelditu oi da

 eta arpegi muxiñez.

 Bere onera ekarri nai, ta

 nundikan eldu jakiñ ez,

 asmatzen lanak izango dira

 naiz eta jakiñ latiñez.

 -9-

 Gure gorputzak ez du izaten

 griña bat ere lotirik,

 erle-ozkadak artu gaberik

 ez da miazten eztirik.

 Ezkontzak frutu ematen badu

 maitasun-intzez bustirik,

 ondorenean izango al da

 errezatzeko astirik?

 -10-

 Oartu bitez gure animak

 iru etsai dituala:

 mundu maltzurra, deabrua, ta

 gure aragi argala.

 Ezkondu arren irugarren au

 txit motz lotu bear dala,

 bestela pasa bearko dira

 astean bi ostirala.

 -11-

 Ai, Holandako apaiz maiteok!

 Nik ez dakit dakizuten,

 emaztearen kargu eginda

 gero zer datorkizuten.

 Luma goxodun txoriak nola

 moko txorrotxak dituzten,

 sermoi-egiten aiñako lanak

 izango dira entzuten.

 -12-

 Ez izan nigan ezkondu eta

 gaitzetsi dedan usterik,

 baiña ez dago zenbait kontseju

 alperrik galtzen uzterik;

 ez det egingo zuek emanak

 zeuei eskeñi besterik:

 Emen ez dago penatu gabe

 zerua irabazterik.