Garaztar batek Algeriatik
Negueloua, Raymond
1
Ainitzen gisa jina niz etsai gudukatzera,
Kasik gogoa berorik, bihotza alegera:
Gaichoa ni, ez nakien ait'et'amen beharra!
Heieri pentsatu-eta aiher baitut nigarra.
2
Choria kantari eder, uda gocho denean;
Bainan tristazen hasten da; negu beltza jitean:
Guk ere bortz eskualdunek, moda bitchi berrian,
«Tenta» bat eraiki dugu harrokaren azpian.
3
Orai ezagutzen dugu Afrikaren aroa!
Hemengo jendea kichkil eta funts charrekoa:
Ahalaz solasa labor, nahiz legun mintzoa:
Bainan kasu, lore pean, ezten pozoindatua!
4
Gaztena, ontzen denean, lur gainean ihaurri!
Hemen ere zonbat odol bazterretan ichuri!
Zonbat lagon tiropean «ama» deituz erori!
Eta ni hetaz nigarrez, bi begiak ithurri...
5
Eskualdun libro nahia kontent laite kanpoan,
Ez balu ibili behar bertzen manamenduan:
Bertzalde, setiatuak, bakarrik desertuan,
Nundik ginuke laguntza behar ordu gaichtoan?
6
Hemengo atsegabetan bihotza zait gainditzen!
Beharrik etchekoen botza letretan dut aditzen
Eta Birjina Maria othoitzean mintzatzen!
Afrikako lur zail huntan ikasten dut sofritzen!
7
Nahiz Frantzia omen den orobat, Algeria,
Eskas aurkitzen diogu Europako airia:
Eremuz toki gaitza da, kasik etsigarria!
Dener nausi, guretako, Eskual-herri ttipia!
8
Untziak noiz gaitu berriz horrarat eremanen?
Etcherateko bidechka noiz dugu iraganen?
Zuen ganik, familia, noiz musuak ukanen?
Oi bai agian guk ere dener laster emanen!