Eskas eta sobera
M.S.
1
Bizian behar baita pairatu asko atsegabe klasa
Eskasaz eta soberakinaz da egun gure solasa
Jasan arazten baiteraukute penitentzia karatsa
Horren gainean egiten dugu aspaldi huntan ametsa
Denen onetan ezti ditezen "sobera eta eskasa".
2
Egundainoko erran zaharrak dionaren arabera
Ez laike behar sekulan bien arte hartarik atera
Nehork ez izan ezazol eta nehork ez izan minbera
Bainan lur huntan guk bizitzeko dugun hazkurria bera
Ikusten dugu tokika eskas "eta tokika sobera".
3
Zertako utzi aipatu gabe aroa eta sasoina?
Bi urte huntan idorte dugu eta garbi zeru gaina
Txarrez finen da, dudarik gabe, oraiko onen ordaina
Hor ere juje uztea hobe zeru ta lurren itzaina!
Aroan ere guhaurek ezin "izar nahi dugun haina".
4
Zikoitza beti penatua da, moltsa ez aski betea
Diru gosean tormentatua, iragaiten du urtea
Xahutzailea eta alferra, ardura fende tristea
Gazte maitea, ez izaiteko geroan bat ez bestea,
Begiztatzea hobe dukezu "horien bien area".
5
Batek lagun bat ezin hatxeman, bertzeak hiru lau berdin
Fede oneko jende frangori emaiten baitu bihotz min
Ezin onetsiz ez justizia hori hola izan dadin
Atsolutuki norbeiten ganik nahi bailukete jakin
Zertako dugun munduan hanbat "eskas eta soberakin".
6
Hain bat badela erakutsia baita denen ageria
Izan dadien janarian ta, bereziki edarian
Laneko suan ala hortako behar dugun tresnerian
Bizi guzia behar ginduke denek pasatu lorian
Denak ukaiten ahal balire "behar diren izarian".
7
Hura eletik ezin ixil ta hori iduriz ezin has
Sobera eta eskasarekin denak bizi nahas mahas
Nahirik ere negurri hura nehork ezin aurki arras
Guk ez jakina izana gatik gaztea otoi zuk ikas
Elgarri hurbil egon arazten "soberakin eta eskas".
8
Amodioa eskas delakotz baita askotan bekaizki
Jenden artean ekartzen dauku zer nahik bezenbat gaizki
Bihotz barnetan ere egiten artetan zonbeit sarraski
Zertako jinak diren mundura: "sobers eta ez aski"?
Gizonak guti jakina gatik, Jainkoak denak badazki!
