Xahar bat gogoetan
M.E.
1
Hirugarren adina orai dute deitzen
Erretreta denborak oro lilluratzen
Izotzak arbola du ostoaz gabetzen
Xahartzearen latza eni gogoratzen.
2
Gaztearan ahalak zoin ederrak diren
Hurbildanik oraino ni orroitarazten
Ustegabean dute ihesi egiten
Gabetza horrek bainau bihotz erdiratzen.
3
Mundu hau den bezala orok dugu egin
Ene partea nun den hain segur bertzekin
Egintzaleak behar berri egon dadin
Jainko onak banindu beti gazte egin!
4
Bizi hunen bidea ez baita luzea
Begi aurrean daukat orai helburua
Ni norat ari naizen ilun dut gogoa
Mundłtarra naiz eta bai ongi lotua.
5
Mundu hunen estekak hain dira azkarrak
Ezinbertzean orai nik utzi beharrak
Bihotza hunki bezaut Kristoren indarrak
Irauteko hark ditu lokarri bakarrak.
6
Oxala banindaike haur bihotz aldatu
Maitasunaz biziak sentsu bat hartzen du
Ederraren ederraz ez dadin funditu
Xede horrek nezala betikotz sustatu.
7
O! maitasun goikoa zu denendakoa
Nork ez dezake sendi galde bat goxoa
Esperantxa beteak argituz geroa
Xaharraren urratsa arinki baitoa.