Ainhoako Beila
1
Ainhoako herrian da Atchulaiko mendia:
Urrundik han ageri da kapera bat churia;
Gogotik harat badoa eskualdun beilaria,
Bihotzetik othoizteko Andredena Maria.
2
Mendekoste biharamun astelehen goiz hortan,
Bazen ainitz mohimendu herriko karriketan:
Herritar eta kanpotiar harat heldu betbetan
Bizikletaz eta oinez, ainitzak otoetan.
3
Bederatziak irian elizako dorrean
Ezkilak errepiketan hasten direnean,
Chantrea kantari hor da aldare aintzinean:
Denak dira abiatzen hor prosesionean.
4
Haur, gazte, gizon, emazte, emanak bi lerrotan,
Kurutzea aintzinean gogo bihotzak sutan,
Bideari dira lotzen kantuz errepiketan:
Maldari gora doatzi kopetak izerditan.
5
Atchulaiko mazeletan artaldea iduri,
Badoa jende ostea, jaun ertora gidari:
Denak gogotikan dira emaiten otoitzari,
Agur, agur diotela Arantzeko Amari.
6
Chantrearen boz ozena urrunera da heltzen,
Amaren laudorioak dituela kantatzen:
Bidez bide kantuz ari nihoiz ez da ichiltzen;
Beilariak horrek ditu hola segur sustatzen.
7
Ene ondoan Aita Chorry gostuan doa oinez:
Jaun hori da dener nausi kharrez eta adinez;
Otoitz, kantu ta prediku harrigarri zen zinez:
Ez dut uste mundu huntan holakorik badenez.
8
Jendea jarraikitzeko usaia chaharrari,
Galborioan da gelditzen, beha Kurutzeari,
Denen hutsez galdatzeko barkamendu Jaunari,
Gogo onez beha dezon oi, bekatoreari...
9
Beilaren bururatzeko, huna meza saindua:
Kaperaren aintzinera hor biltzen da mundua;
Gain hartarik urrun doa denen otoitz kantua;
Hola da Ama Birjina hobeki laudatua.
10
Atchulaiko gain hortarik choratzen da begia;
Mendiak dira ikusten eta itsas hegia;
Herri handi eta ttipi, bichta choragarria!
Ama onak beira beza handik Eskual-Herria.