1941-an pausatu aita zenari

Minaberry, Peio

 1

 Mezu hau helarazirik aingeru begiraleaz

 Neure baitan zoriona egungo egitateaz

 Ez naiz ni batere orroitzen aita zure izaiteaz

 Bainan ainitz eite omen dut nik zuri begitarteaz.

 2

 Menturaz ahanzter nauzu, multxo bat zinuelakotz

 Zazpi semetan gaztena ni gertatu nintzelakotz

 Memento lazgarriak ziren, oro haurrak ginelakotz

 Zeruraino hegaldatzean ordu hartan sekulakotz.

 3

 Zure pausa bezen laster, Donoztiri Agerrean

 Osebak hazi ninduen askitto luzaz haurrean

 Bihotz onez usnatu zuen gure ama beharrean

 Hamar haurrekin alargundua adinik ederrenean.

 4

 Urteak hiru nintuen, biziaren hastapena

 Suertez aitaren ordain zur-anai Battitta zena

 Bizi guziko orroitgarri dut nik haren erakaspena

 Izpirituan barnatik daukat ottoren orroitzapena.

 5

 Arreba ttipiarekin arduraxko ohakoan

 Itzali zinelarikan aita gain hartarakoan

 Zure itxura kantuarekin apaindurik oraikoan

 So ezti baton atsegina gau oroz oherakoan.

 6

 Espos bat xarmegarria gaztean bizi laguntzat

 Ama bat miresgarria lurrean bere haurrentzat

 Eskerrik,beroenak orai haurridek aita zuretzat

 Auxtina hautaturikan denboran gure amatzat.

 7

 Anai-arrebak agian oro batetaratuak

 Burrasoen goresterat gare deliberatuak

 Euskaldun bertsu sarkorretan-eginik gure hautuak

 Bihotzetik jalgiren dira ait'et'amaren kantuak.

 8

 Hune neure gutizia ikara bat gorputzean

 Zuekilan, Jainko Jaune semeaz urrikaltzean

 Azken hatsa amen orduko arimaren jujatzean

 Ait-amekin izan nadien dohatsu heriotzean.