Gizonaren galbarioa
Menditarra, Juanes
1
Dolamenezko oihu handi bat ene barnetik badoa
Nigarrez urtzen ari baitzauzkit bihotza eta gogoa
Gizon artean sortu zerauku zinezko galbarioa
Hiltzearekin ordainduz orai lehengo amodioa.
2
Euskal-herritik urrun nago ta entzuna dut oihartzuna
Lehen argia zagon tokian sartu zaukula iluna
Hobenik gabe elgar hiltzea hauxet da gauza lizuna
Jainkoaz kanpo gizonak nola juja dezake laguna.
3
Hameka jende kondenatu ta hetarik bost ehortziak
Horra egungo jendeak dauzkan herra-lanen gutiziak
Hil derauzkute bi euskaldunak hobenik gabe guziak
Estimu geio ez lukea ba merezi jenden biziak.
4
Hobendun handi batto badago erraiteaz ez naiz lotsa
Zertako bada egiten duzu holako lege zorrotza
Bizi uzteko ez duzu entzun Aita Sainduaren botza
Ala burdinaz eginik dago zure barneko bihotza.
5
Mundu guzia trixtatzen duzu behar bidean alaitu
Barnean dauden idai gaixtoak behar litazke garraitu
Bertzen bizia hole hausteak ondorio txarra baitu
Zu ere noizbait Jaun Zerukoak ongi jujaturen zaitu.
6
Giltzen azpian dagon andrea daukat oraino gogoan
Aingeru baten aiduru dena gartzela baten xokoan.
Haurrak hobenik ez dauka, amak huts egin duelakoan
Itzal ilunez haziko cute hura munduratekoan.
7
Holako gauzik gerta zaikela nori zitzaion iduri
Anaien hiltze horrek bihotza hunkitzen derauku guri
Herriarentzat beren odola dutelakoan ixuri
Eskaintza hori izan dadila geroko bake iturri.
8
Bizia eman izan dutenak ikusi gabe argirik
Onetsi gabe joan zauzkigu hartze zaukaten grazirik
Balinbadago gaurko jujetan xuxen ari den bihirik
Bildotsik ez hil sekula santan otsoak utziz bizirik.
9
Munduan nor da itzal gabeko huts egiten ez duena?
Inozentaren kondenatzea horrek emaiten du pena.
Zinez trixtea dago lurrean bihotzik gabea dena
Gizonak nolaz gaztiga liro Jaunak barka dezakena.
10
Dohakabea dagon presunak badauka ainitz bizio
Askotan bertzen odolaz egin nai dute sakrifizio
Heriotzea hartuz gizonak bizikotzat ofizio
Naski guhaurek eginen dugu hole azken judizio.
