Arrosak
Mayi F.
1
Muttiko bat zen Baionakoa:
ez zuen amaz bertzerik...
Ospitalean zagon ama hoi,
ohe batean eririk;
Emaztekiak loreak maite,
arrosak oroz gainetik.
Haurrak hirian lili erosten
harentzat bere sosetik,
Ospitalerat baitzakarzkion
erranez potten artetik:
ERREPIKA
Huna, amatto, igandekari,
maite ditutzun arrosak.
Handitu-eta lili erosten
chahutuko tut nik sosak...
Saskitaraka nahi nauzketzu
zuri ekarri arrosak...
2
Ama gaichoa artatzen zuten,
bainan ez zoan hobeki;
Haurra karrikan, ama gogoan,
arroseri so egoki.
Sakela-zolan dohakabeak
diru-pilik ez izaki.
Ahurtara bat arrosa churi
ebatsi zuen cherrenki;
Bainan martchanta ohartu baitzen,
haurrak in zion echtiki:
ERREPIKA
Amattorentzat, igandekari,
nituen hartu arrosak.
Ospitalean ene goait dago,
egunak ditu hain hitsak!
Alegrantzia izanen zaizkon
harentzat bildu arrosak!
3
Lili martchantak musu batekin:
«Haurra, har-zkik, har, loreak!»
Haurra partitu, arin bihotza,
barkaturikan andreak.
Lasterka zoan arrosekilan,
gorririk begi tarteak...
Harat-orduko: «Amarik ez duk!»
dio erizain gazteak...
Eta belhaunko ohe-ondoan
erraiten du haur maiteak:
ERREPIKA
Huna, amatto, igandekari,
maite dituizun arrosak.
Zerurakoan, nahiz han dauden
loreak diren arrosak,
Semetto hunen orhoitzapenez
har-zkitzu ene arrosak.