Nagiaren zerua
Manterola, G.
Orduari-tirriñak
esnatu dai nagia
bere lo-zorrotik...
begiak idigiaz,
besoa ateratzen dau
Izarren azpitik.
«Au dok otza» esanaz,
barriro bai bizkor be
sartu dau barruan,
estalkiak biribil
baturik atsegiñez
buru-inguruan.
Norbaiten otsa dantzu
samurki diñotzola:
«Ordua dok, mutil!»,
nagiak oe barru,
begiak itxiagaz
yarraitzen dau ixil...
Eginbearren deiak
leunkiro esatean:
«Yagi adi, alper!».
Zerbait erantzun bear
barruz baketuteko
ta diño: «Bai, laster»...
Beste bira bat egin,
ozkirria kentzeko
ta logalez darrai,
epelaren goxoa,
txastatuaz, pozkiro
gerokoaren zain.
Bein ta barriro dantzu
eginbearren deia:
Mutil, berandu dok!».
Bere artean diño:
«Berandu ba'dok zertan
orain yagiko nok?».
«Yarraitu daidan, beintzat
oetxo epelean,
otzatik igesi,
gero be izango dok
lanerako astia...
beintzat ondo bizi.»
Ori oe beroan,
neguko goiz otsetan
nagian legea,
oian jira-biraka
errotarri antzera,
bizi-laburtzea.
|