Mutchurdinaren ahuenak
1
Bertsuak egin dazkot ene buruari;
Arrangurak baditut gogoan ihauri:
Gizongei gostukorik nehun ez ageri!
2
Berrogoi-ta-sei urthe buruilan konplitu,
Eta larrua berriz pichka bat zimurtu:
Mutchurdin zahartzeaz nola ez beldurtu?
3
Oraidino ez nuzu neskako ilauna;
Nehoiz izitu gabe egiten dut lana:
Ez da gaizki izanen ni hartzen nuena.
4
Gazterik ikasia josten ta lisatzen,
Badakit aste guziz sosaren goititzen:
Senhartcho bat besterik ez dut desiratzen.
5
Lehen senhar beharrak osteka nituen:
Gau, egun, ene ganat bethi heldu ziren;
Orai ez dakit hoiek nora johan diren.
6
Gaztean banituen nik zazpi «nobio»
Nolaz ez nuen hartu heietarik batto?
Ondotik dolutzea ez du ez balio!
7
Alta zazpiak ziren denak gizon bizkor!
Ene edertasunaz zazpiak nahikor:
Hiru oker, lauso bat, eta hiru konkor!
8
Neskatch eder nagola oino iduri zat;
Bi kintaleko hori hasteko badaukat:
Ai zer berogarria donado batentzat!
9
Donadorik ez bada, bota alarguna;
Ez da errech egiten gostuko fortuna;
Nolazpait nahi nuke gauazko laguna.
10
Ehun mila libera badaukat dotea;
Kasik beste hanbeste etcheko partea;
Ni hartuko nauenak ai zer subertea!
11
Halere ez dut nahi gaichto ez nagirik.
Eta hain guti berriz mozkor ez hordirik:
Tcharra izaitekotan hobe dut bakarrik.
12
Jakin nahi badute nongoa naizen ni,
Egia erraitea bethi da komeni:
Irungo alaba naiz Jochepa-Antoni.