Munduko itzulia eta Frantziakoa
1
Munduan gaindi pasatzen dira
gertakizunak milaka,
Helde, ixtripu, gaixtakeria,
nahigabeak trumilka...
Bainan jendea itsurik dago,
axola guti daduka...
Ah! Frantziako itzuli hartaz
egiozue kalaka!
2
Atzo dolarra kraskatu dela
berria zaiku etorri:
Ondorio tzar asko gaitz horrek
behar baitauzku ekarri!
Jendeak badu bertze griņarik,
beha dago berrieri:
Ea kukuak joko dionetz
azkenean Ocaņari!
3
Irak-en bade odol-ixurtze,
herra mintzo da itsuski;
Irlandan ere ehunka dolu
gerlak etxetan ekarki!
Bainan jendeak gogoa zertan
nahi du hemen atxiki?
Guimard gaixoak bere belauna
ongi duen ala gaizki.
4
Pazifikako ugarteetan
populu batzu ikaran.
Frantsesen bonba atomikoak
nori dioken gaitzikan...
Bainan jendeak egun hauietan
badu bertzerik gogoan:
Zertako ba Merckx ez den agertu
Frantziako itzulian!
5
Afrikan luzaz dena idorte,
eta bet-betan urite:
Gose, egarri, sukar, izurri,
zer nahi sofritzen dute.
Bainan jendeak Poulidor hartaz
du bihotz guzia bete:
Ez denetz behin itzuli hortan
xapeldun helduko ote?
6
Mundu guzian kordoka dago
erresumen zoriona,
Dena irrisku, leizeak hurbil,
jendea aldiz arina:
Bidetan gaindi zoraturik so
bizikletadunen gene,
Iduri-eta hetarik doan
gu denen etorkizuna!