Euskaldun anaiez
Lekuona, Michel
1
Ameztoi Makearra, zu hoin «penatua»
Arrangura daukuzu hemen agertua
Euskal anaiendako egin ostatua
Etsenplu tzarra zautzu, ezin onartua.
2
Nago zure baitarik ote ziren ari
Ala bertze norbeiten marro aintzindari
Ez naike ixil egon piltzar bat iduri
Ikusiz zure tua euskaldungoari.
3
«Estranjera» daukazu euskaldun anaia
Herriz-herri dabilan bake-gudaria
Libertatea galdez egin eskaria
Noiz izan da bekatu edo tzarkeria.
4
Herriko gizon gisa ez mintza bakarka
Herrian baitzirezte zurekin hameka
Zuk segurik ez duzu zeren espantuka
Azken ttottoa duzu, ta hura erdizka.
5
Euskaldun anaieri ateak hestea
Herri-gizon batentzat zer egitatea
Zuk egin behar hura nihauk egitea
Ez daukat desohore, bai karitatea.
6
Urte-saria baitut errana pagatzen
Ez duzu izartzerik hemen nor den sartzen
Bakotxaren etxea dut errespetatzen
Errespetu bera dut ordainez galdatzen.
7
Apez etxe hunetan sartu da gudari
Azken gerla denboran gauaz iheslari
Len hori ez zitaken gustatzen deneri
Gero bai ohoreak egin lanen sari.
8
Orduan on zen lana orai ez bekatu
Euskal-Herriak badu kopeta goratu.
Bere seme guziek behar zerbitzatu
Ez egon bazterretik mutur edo mutu.
9
Ama Euskal-Herria dago zauriturik
Bere semek baitute ukatzen lehenik
Odolaren mintzoa herrian itorik
Badugu ikasteko Xalbadorren ganik
10
Orroit zirea nola joan den azaroan
Urepelen izanik lau lagun otoan
Xalbadorren amenez euskal su beroan
Nere bizi guziko sartu zait gogoan.
11
Euskaldunen artean zer egun goxoa
Han bildurik baitzagon Euskadi osoa
Han euskal odolaren adi zen mintzoa
Geroztik zorigaitzez aurtengo martxoa.
12
Suminduz erranari ez diot kasurik
Euskaldungoa ez dut hortaz ukatzerik
In ahal eginen dut nik nere aldetik
Euskal-Herria nahiz azkar eta zutik.
13
Egiazko estranjer hemen badabila
Beretzen dituztela lur eta etxola
Makeako gazteak kanpo doazila
Hori dut nere «paria», hortaz dut axola.
14
Diru poxi baten truk salduz bere Ama
Ber denboran ukatuz euskaldun arima
Hola ez da goratzen euskaldunen fama
Batzun galdukeriak hobirat derama.
15
Zorionez ez dire denak holakoak
Badira ere onak, odol berokoak
Euskaddun some zintzo bihotz haundikoak
Hemen izan direnak ziren holakoak.
16
Erran beharrak erran dezagun burura
Zuk nahi duzunean biak joanen gira
Horion agurtzera Donosti aldera
Euskadiren bihotza jotzen entzutera.
17
Buruzagitza ez da bakarrik ohore
Berekin uztarritzat badu eginbide
Euskaldun agertzeko ez egon herabe
Denak zintzoki joka berexgorik gabe.