"Franki"

Lasarte

 -1-

 Hirurogeita hamabost urte

 gizaldiak emeretzi,

 negua igaro degu gainera

 martxoak bait ditu gaur bi;

 Frankiren penak Frankiren pozak

 bertso pobretan kantari:

 Oroimenean gorde zaitzala

 Lasarte Leitzak zu beti.

 -2-

 Frankiko bordan jaio omen zen

 Plazaola ondoan hazi,

 goitik behera Orioraiño

 Leizaran bezela jetxi;

 sortzen ikusi zindun herriak

 gaur agintzen dizu garbi

 oroimenean gordeko zaitu

 Lasarte Leitzak zu beti.

 -3-

 Herririk herri hor ibilli da

 Manuel Lasarte kantari,

 jaioterria ez dio ukatu

 horrek sekulan inori;

 eta Leitzako ama herriak

 gogoan hartzen badaki

 Oroimenean gordeka zaitu

 Lasarte Leitzak zu beti,

 -4-

 Haizek eraman izanen ditu

 bertso bikainak ugari,

 Leitzari bota zenizkionak

 ez dira ahaztuko noski,

 hemendik urte eta urtetan

 eta gizaldiz gizaldi,

 oroimenean gordeko zaitu

 Lasarte Leitzak zu beti.

 -5-

 Erreka bera ur diferentez

 hornitutakoa izaki

 gaur hemen bildu garen leitzarrok

 ez gaituzu ezagun aski;

 baina gazteok ere dakigu

 non sortua dugun Franki

 Oroimenean gordetzen zaitu

 Lasarte Leitzak zu beti.

 -6-

 Harri ederrak eta kaxkarrak

 paretaren osagarri,

 momentu onak eta makalak

 dagozkio bizitzari;

 Lasartek ere ozpin tragoak

 zer dasta duen badaki,

 baina alai nahi zaitu ikusi

 Lasarte Leitzak zu beti.

 -7-

 Maitasun kanta alai ta triste

 eta lagunari ziri,

 lanaren neke eta samiñak

 eta euskerari eutsi;

 horra ba zertan ibilli zaigun

 herritarra bertsolari

 eta bertsotan gogora zaitu

 Lasarte Leitzak zu beti

 -8-

 Amorrainak ez dirade asetzen

 urez sekuletan aurki,

 Leitzako herriak hauxe eskatzen

 dizu berritikan zuri:

 bertso eder bat bota zazula

 zeure jaioterriari,

 ta oroimenean gordeko zaitu

 Lasarte Leitzak zu beti.

 -9-

 Bertsotarako ahalmenikan

 nik iñolaz ez izaki,

 lapitzez egin beharra daukat

 saiaturikan ugari;

 plazarako ni gauza ez izanik

 zinta ezkututik naiz ari

 oroimenean izan zaitzala

 Lasarte Leitzak zu beti.